Activities
Soreca apel të rinjve: Votoni, një e drejtë dhe përgjegjësi që duhet ta ushtroni
TIRANË, 1 prill /ATSH/ Kreu i delegacionit të Bashkimit Europian në Tiranë, Luigi Soreca, u ka bërë sot një apel të gjithë të rinjve që të shfrytëzojnë të drejtën e tyre të votës për të ndryshuar të ardhmen e tyre.
Duke folur pas një aktiviteti për programin e Erasmus+ në Universitetin Bujqësor të Tiranës, Soreca tha se, “ju bëj thirrje ju, të rinjve të Shqipërisë që të votoni, të ushtroni të drejtën që ju keni për të hedhur votën tuaj pikërisht në ato kuti votimi. Pra merrni pjesë. Kjo është e drejta juaj, ju duhet ta përdorni atë. Për më tepër nuk është vetëm një e drejtë, është edhe një përgjegjësi, të cilën ju keni dhe duhet ta përdorni, pra mos e lini atë mënjanë, mos e hidhni këtë mundësi që ju jepet, por përdoreni atë. Dhe ashtu siç thoni ju në shqip “Ti vendos”.
Duke folur për programin Erasmus +, Soreca u shpreh se, “kam pasur mundësinë të shoh sesa mirë janë vënë në zbatim fondet e BE në këtë Universitet me anën e një programi tejet të rëndësishëm, që është krijuar këtu, që është quajtur Smart -Al. Një program, i cili bëhet në bashkëpunim me shtete anëtare të BE si Franca dhe Gjermania përshembull”.
“Erasmus+ është një program shumë i rëndësishëm. Ndoshta shumica prej jush e keni dëgjuar atë ose e njohin atë si një program shkëmbimi arsimor për të rinjtë, për studentët. Megjithatë Erasmus+ është shumë shumë sesa kaq. Erasmus+ është një program me të cilin përfitojnë dhe mësojnë edhe akademikët, jo vetëm në Shqipëri, por edhe në shkëmbim në BE. Dhe përveç kësaj, përfitohet edhe me anën e pajisjeve gjë e cila është po aq e rëndësishme”, tha ai.
“Sot kemi pasur kënaqësinë që të festonim dhe të bisedonim edhe për një gjë tjetër shumë të rëndësishme për Erasmus+. Është lançimi i fazës së dytë të Erasmus+, i cili sapo është lançuar nga BE. Dhe lajmi i mirë këtu është fakti se për vitin 2021-2027 fondet e këtij programi janë pothuajse dyfishuar tërësisht pra nga 14 miliardë euro që ka qenë më përpara buxheti tashmë është bërë 26 miliardë euro. Një fond nga cili do të përfitojnë, studentët, akademikët shqiptarë, duke shkëmbyer përvojat e tyre dhe për mësimdhënien në BE dhe anasjelltas. Me këtë dëshirojmë të themi që Europa është këtu, ne jemi këtu, për të ndihmuar studentët, akademikët shqiptarë që të gjithë së bashku, në veçanti ky grup, studentët dhe akademikët, të shtyjnë përpara për anëtarësimin e Shqipërisë në BE, pra integrimin e Shqipërisë”, theksoi Soreca.
“Shqipëria ka qenë vend edhe vazhdon të mbetet për Erasmus+, pararojë në rajon, sepse Shqipëria ka qenë vendi i parë i rajonit, i cili në vitin 1992 u bë pjesë e programit Erasmus, ose i atij që ishte programi pararendës i Erasmusit. Dhe gjatë gjithë kësaj kohe 8 mijë studentë dhe akademikë shqiptarë kanë shkuar në BE, në institucionet e arsimit të lartë të BE. Dhe ndërkohë 5 mijë studentë dhe akademikë të BE, pra qytetarë të BE, kanë ardhur në Shqipëri për të përfituar nga institucionet e arsimit të lartë shqiptar. Ky është edhe vizioni ynë, kjo pikë e cila na bashkon të gjithëve. Ne në BE, por edhe ju, dhe ne të gjithëve pra na bën së bashku, kjo është arsimi”, u shpreh ambasadori Soreca. /a.a/r.e/